Detalle noticia

Volver atrás
14 FEB de 2021
Estreamos logo e identidade corporativa

Actualizamos a nosa imaxe. Nesta noticia explicamos como e por que o facemos.
O logo co que nos identificábamos ate o de agora non resultaba funcional, xa que so chegou a nos unha copia en formato JPEG de 37 kb, é dicir, moi comprimido e de baixa calidade, polo que non pode ser reproducido en tamaños grandes ou en formatos destinados a unha impresión de calidade. Tampouco temos información sobre as cores ou tipografías utilizados, co que resulta practicamente imposible establecer unha identidade visual corporativa. Por outra banda, resulta imposible dispor dunha versión do logo con fondo transparente ou en negativo, o que limita moitísimo a súa usabilidade. 

Cambiar de logo non era un desexo, era unha necesidade. E xa que o facíamos, queríamos aproveitar a oportunidade para achegarnos a unha estética máis actual e para construír unha identidade que reflectise os valores da Asociación e o motivo da súa existencia. 

Por iso, inspirámosnos nun dos obxectivos fundacionais de ASAC Galicia, co que están relacionados tódolos demais: a visibilidade e o coñecemento das Altas Capacidades. 

O imagotipo é unha pupila encaixada na letra C da tipografía que habitualmente utilizan os oftalmólogos na súa consulta. É un ollo que ve, que fai foco, que da a coñecer, que amosa o seu punto de vista. 

A pupila é verde, unha cor que aporta luz e claridade. Simboliza acción, desprazamento, avance, serenidade, tranquilidade, esperanza, mocidade e frescura. Está combinado cun gris matizado que aporta elegancia e neutralidade, dotando ao logotipo de contraste e forza. 

Como diciamos, a tipografía elixida é aquela coa que nos gradúan a vista, o que salienta a mensaxe do logotipo: para ver hai que querer ver e saber mirar.

O pe de marca ten un ton verde máis escuro e neutral e unha tipografía con serifas que dota ao conxunto de robustez e institucionalidade. 

Tense deseñado as aplicación en cor e monocromo do logotipo e tamén unha aplicación na que o pé de marca substitúese por un lema: ?Se miras, verás?. Este slogan ten un ton maxenta que se asocia con conceptos como entrega, xenerosidade e axuda, moi acordes coas actuacións que leva a cabo a Asociación e coa nosa intención de estar sempre dispoñibles para axudar ao noso colectivo e a todos aqueles profesionais que son de vital importancia no seu desenvolvemento: mestres, orientadores, pediatras, etc.

A autora do logo e do cambio de identidade corporativa é Soledad Parral, a actual secretaria de ASAC Galicia, a quen lle temos que agradecer o seu tempo e dedicación neste proxecto.

Paulatinamente, o novo logo irá substituíndo ao anterior en tódolos ámbitos. Esperamos que vos guste!
Noticia general
Noticias ASAC Galicia
912 veces lérona